ဘုရားသခင်၏ စကားတော် | အခန်း ၄၄

ငါသည် ဖြောင့်မတ်သည်၊ ငါသည် သစ္စာရှိသည်၊ ငါသည် လူသား၏ အတွင်းကျဆုံးသော စိတ်နှလုံးကို စစ်ဆေးသော ဘုရားသခင် ဖြစ်၏။ မည်သူက စစ်မှန်သည်၊ မည်သူက မှားယွင်းသည်ကို ငါသည် မဆိုင်းမတွ ထုတ်ဖော်မည်။ ထိတ်လန့်တုန်လှုပ်ရန် မလိုအပ်ပေ၊ အရာရာအားလုံးသည် ငါ၏အချိန်ဖြင့် အလုပ်လုပ်ကြသည်။ မည်သူက ငါ့အား ရိုးသားစွာ လိုအပ်သည်၊ မည်သူက ငါ့အား ရိုးသားစွာ မလိုအပ်သည်ကို ငါသည် သင်တို့အား ပြောပြမည်။ ကောင်းစွာစား၊ ကောင်းစွာသောက်၊ ငါ့ရှေ့မှောက်သို့ လာပြီး၊ ငါနှင့် နီးကပ်စွာသာနေလော့၊ သို့ဖြစ်လျှင် ငါ၏အလုပ်ကို ငါကိုယ်တိုင်လုပ်မည်။ လျင်မြန်သော အကျိုးကျေးဇူး ရရှိရန်အတွက်၊ ကြောင့်ကြခြင်းမရှိနှင့်၊ ငါ၏အလုပ်သည် ချက်ချင်း အားလုံး ပြီးမြောက်စေနိုင်သည့် တစ်စုံတစ်ရာ မဟုတ်။ ထိုအထဲ၌ ငါ၏ခြေလှမ်းများနှင့် ငါ၏ဉာဏ်ပညာတို့ ပါဝင်သောကြောင့် ငါ၏ဉာဏ်ပညာကို ထုတ်ဖော်ပြသနိုင်သည်။ ငါ၏လက်များဖြင့် ပြီးမြောက်သည့်အရာသည် အဘယ်အရာဖြစ်သည်ကို ငါသည် သင်တို့အား မြင်စေမည်၊ ဆိုးသောသူကို အပြစ်ဒဏ်ပေးခြင်းနှင့် ကောင်းသောသူကို ဆုကျေးဇူးပေးသနားခြင်း ဖြစ်ပေသည်။ ငါသည် တစ်ဦးတစ်ယောက်ကိုမျှ ဘက်မလိုက်သည်မှာ အသေအချာပင်ဖြစ်သည်။ ငါသည် ငါ့အားချစ်သော သင့်ကို ရိုးသားစွာ ချစ်ပြီး၊ ငါ့အား ရိုးသားစွာ မချစ်သော မည်သူအပေါ်မဆို ငါ၏အမျက်ဒေါသ ကျရောက်လိမ့်မည်၊ ထိုကြောင့် ငါသည် စစ်မှန်သော ဘုရားသခင်၊ လူသား၏ အတွင်းစိတ်နှလုံးကို စစ်ကြောသော ဘုရားသခင်ဖြစ်ကြောင်း သူတို့သည် အမြဲမှတ်မိကြလိမ့်မည်။ အခြားသူများ၏ရှေ့တွင် တစ်မျိုး၊ သူတို့ ၏ နောက်ကွယ်၌ အခြားတစ်တမျိုး မပြုမူနှင့်၊ ငါသည် သင်ပြုသမျှသော အရာအားလုံးကို ရှင်းလင်းစွာမြင်ပြီး၊ သင်သည် အခြားသူများအား အရူးလုပ်ကောင်းလုပ်နိုင်လိမ့်မည် ဖြစ်သော်လည်း ငါ့အား မလုပ်နိုင်။ ငါသည် ၎င်းတို့အား ရှင်းလင်းစွာ မြင်ရသည်။ သင်သည် မည်သည့်အရာကိုမျှ ဖုံးကွယ်ရန် မဖြစ်နိုင်၊ အရာရာအားလုံးသည် ငါ့ လက်ထဲ၌ရှိသည်။ သင်၏ တစ်ကိုယ်ကောင်းဆန်သော တွက်ချက်မှုများကို အသင့်ပြင်ကာ သင့်ကိုယ်သင် ထက်မြက်သည်ဟု မထင်နှင့်။ လူသားသည် အစီအစဉ် တစ်ထောင် သို့မဟုတ် တစ်သောင်း ပြုလုပ်နိုင်သော်လည်း၊ နောက်ဆုံး၌ သူတို့သည် ငါ၏လက်ဖဝါးထဲမှ မလွတ်မြောက်နိုင်ကြောင်း ငါသင့်ကို ပြောမည်။ အရာရာတိုင်းနှင့် အဖြစ်အပျက်တိုင်းတို့သည် ငါ့လက်များထဲ၌ အုပ်ချုပ်ခြင်းခံရပြီး၊ လူသားတစ်ယောက်အနေဖြင့် ဤထက်မက အဘယ်မျှ ပိုဖြစ်နိုင်မည်နည်း။ ရှောင်ရှားရန် သို့မဟုတ် ပုန်းကွယ်ရန် မကြိုးစားနှင့်၊မလိမ်လည်မလှည့်စားနှင့် သို့မဟုတ် မဖုံးကွယ်နှင့်။ ငါ၏မွန်မြတ်သော မျက်နှာထား၊ ငါ၏အမျက်ဒေါသနှင့် ငါ၏တရားစီရင်ခြင်းတို့သည် လူသိရှင်ကြား ထုတ်ဖော်ပြီးဖြစ်ကြောင်းကို သင်သည် မမြင်နိုင်သလော။ ငါ့အား ရိုးသားစွာ အလိုမရှိသောသူများကို သနားကရုဏာကင်းမဲ့စွာဖြင့်၊ ငါသည် ချက်ချင်း တရားစီရင်မည်။ ငါ၏သနားခြင်းကရုဏာသည် အဆုံးစွန်သို့ ရောက်ရှိနေပြီဖြစ်ပြီး၊ ဘာမျှ မကျန်ကြွင်းတော့ပေ။ သီလကြောင် ဆက်လက် မဖြစ်စေတော့ဘဲ၊ သင်၏ ပရမ်းပတာ နည်းလမ်းများကို ရပ်တန့်လော့။

ငါ့သားတို့၊ ဂရုစိုက်ကြလော့၊ ငါရှေ့မှောက်၌ အချိန်ပိုမိုကုန်လွန်စေပြီး၊ ငါသည် သင်၏ အထောက်အပံ့ဖြစ်လိမ့်မည်။ ကြောက်ရွံ့ခြင်းမရှိနှင့်၊ ငါ၏အသွားနှစ်ဖက်ပါသောဓါးကို ရှေ့သို့ယူဆောင်ကာ ငါ၏အလိုတော်အတိုင်း စာတန်ကို နောက်ဆုံးအချိန်အထိ တိုက်ခိုက်လော့၊ သို့ဖြစ်လျှင် ငါသည် သင့်ကို ကာကွယ်ပေးမည်။ စိုးရိမ်ခြင်းမရှိနှင့်၊ ဖုံးကွယ်ထားသော အရာမှန်သမျှသည် ဖွင့်လှစ်ပြီး ထုတ်ဖော်ခြင်း ခံရလိမ့်မည်။ ငါသည် အလင်းကိုပေးသောနေဖြစ်ပြီး၊ အမှောင်ထုအားလုံးကို ရက်ရက်စက်စက် လင်းစေမည်။ ငါ၏တရားစီရင်ခြင်းသည် အပြည့်အဝ ပေါ်ပေါက်ခဲ့ပြီး ဖြစ်ကာ၊ အသင်းတော်သည် စစ်မြေပြင် ဖြစ်သည်။ သင်တို့ အားလုံး အဆင်သင့်ဖြစ်ပြီး၊ သင်၏ ဖြစ်တည်မှုအားလုံးကို နောက်ဆုံး ဆုံးဖြတ်ချက်ချမည့် စစ်ပွဲ၌ လုံးလုံးလျားလျား ပေးအပ်မြှပ်နှံ ထားရမည်၊ ငါသည် ငါ့အတွက် လှပအောင်မြင်သည့် စစ်ပွဲ၌ တိုက်ပွဲဝင်သော သင့်ကို သေချာစွာ ကာကွယ်ပေးမည်။

သတိရှိကြလော့၊ ယနေ့ခေတ်လူတို့၏ စိတ်နှလုံးများသည် လှည့်စားခြင်းဖြင့် ပြည့်ကာ၊ ခန့်မှန်း၍ မရနိုင်ဘဲ၊ ထိုသူတို့အား ယုံကြည်၍မရ။ ငါသည်သာ သင်တို့အတွက် အလုံးစုံ ဖြစ်သည်။ ငါ့အထဲ၌ လှည့်ဖြားခြင်းမရှိ၊ ငါ့အပေါ်တွင်သာ မှီခိုလော့။ ငါ့သားတို့သည် နောက်ဆုံး ဆုံးဖြတ်ချက်ချမည့် စစ်ပွဲကို ဧကန်အမှန် အောင်မြင်လိမ့်မည်ဖြစ်ပြီး၊ စာတန်သည် သေခါနီး ဆန့်တငင်ငင် အခြေအနေတွင် ဒေါသတကြီးရမ်းကာ၊ ရှေ့သို့ မလွဲမသွေ ထွက်လာလိမ့်မည်။ ကြောက်ရွံ့ခြင်းမရှိနှင့်။ ငါသည် သင်၏တန်ခိုး၊ ငါသည် သင်၏အလုံးစုံ ဖြစ်ပေသည်။ အကြောင်းအရာများကို ထပ်ခါထပ်ခါ မစဉ်းစားနှင့်၊ သင်သည် အတွေးများစွာကို အာရုံမစိုက်နိုင်။ အချိန်သည် အလွန်ပင် အပူတပြင်း အရေးကြီးနေသောကြောင့်၊ ငါသည် သင်တို့ကို လမ်းကြောင်းတလျှောက် ဆွဲယူမသွားနိုင်တော့ကြောင်း၊ ယခင်က ငါပြောခဲ့ပြီး ဖြစ်သည်။ သင်တို့၏ နားရွက်များကို ထပ်၍ ထောင်ပြီး သင်တို့ကို သတိပေးရန် ငါ၌ အချိန်မရှိ၊ ဤအရာသည် မဖြစ်နိုင်။ တိုက်ပွဲအတွက် သင်တို့၏ ပြင်ဆင်စရာများကိုသာ အဆုံးသတ်လော့။ ငါသည် သင့်အတွက် အပြည့်အဝ တာဝန်ယူသည်၊ အရာရာအားလုံးသည် ငါ့လက်ထဲ၌ ရှိသည်။ ဤအရာသည် သေရေးရှင်ရေးစစ်ပွဲဖြစ်ပြီး၊ သေသည်တိုင်အောင် အပြင်းအထန် ကြိုးပမ်းရလိမ့်မည်။ သို့သော်လည်း ငါသည် ထာဝရအောင်မြင်ခြင်းနှင့် ရှုံးပွဲမရှိသောသူဖြစ်ကြောင်းနှင့် စာတန်သည် ဧကန်မုချ ပျက်စီးလိမ့်မည်ဖြစ်ကြောင်းတို့ကို သင်နားလည်ရမည်။ ဤအရာသည် ငါ၏ချဉ်းကပ်နည်း၊ ငါ၏လုပ်ဆောင်မှု၊ ငါ၏အလိုတော်နှင့် ငါ၏အကြံအစည်တော်တို့ ဖြစ်သည်။

ပြီးမြောက်ပြီ။ အရာရာအားလုံး ပြီးမြောက်ပြီ။ သူရဲဘောမကြောင်နှင့် သို့မဟုတ် မကြောက်နှင့်။ ငါသည် သင်နှင့်အတူ၊ သင်သည် ငါနှင့်အတူ ထာဝရ အစဉ်အမြဲ ရှင်ဘုရင်များ ဖြစ်လိမ့်မည်။ ငါပြောခဲ့သော နှုတ်ကပတ်တော်တို့သည် ထာဝရပြောင်းလဲခြင်းမရှိဘဲ၊ အဖြစ်အပျက်များသည် သင်တို့အပေါ် မကြာခင် ကျရောက်လာလိမ့်မည်။ သတိထားစောင့်ကြည့်လော့။ သင်သည် နှုတ်ကပတ်တော် တစ်လုံးချင်းစီကို ကောင်းစွာ ဆင်ခြင်သင့်သည်၊ ယင်းတို့အပေါ်တွင် ရှေ့ဆက် မရေမရာ မဖြစ်နှင့်။ သင်သည် ၎င်းတို့နှင့်ပတ်သက်၍ အတွေးအမြင် ရှင်းလင်းနေရမည်။ ငါရှေ့ ၌ အချိန်ပိုမို ကုန်လွန်စေရန် အမှတ်ရလော့။

နှုတ်ကပတ်တော်သည် လူ့ဇာတိ၌ ပေါ်လာ၏ မှ

အကြံပြုစာမျာ: ခရစ်တော်သည် တရားစီရင်ခြင်း အမှုကို သမ္မာတရားဖြင့် ဆောင်ရွက်၏